相信每個買過校服嘅學生哥，都聽過有種布料叫做「的確涼」，究竟佢著上身係咪特別涼？除咗做校服，依種布料究竟同平時成日食嘅腸粉有咩關係？

的確涼其實係取自英文Dacron嘅譯音，佢本身係滌綸嘅紡織物。報道話依款布料响六十年代已經出現，一開始用黎做恤衫，白色同藍色居多。本身最主要都係女性著，後來唔少男性嘅衫都開始用的確涼布黎整，而且越黎越多花色。呢種布料薄得嚟夠輕，而且耐磨耐熱，加上快乾同免熨嘅特性，令佢擊敗棉質布料，雄踞香港校服界嘅半壁江山。以前啲人無咩機會嘆冷氣，風扇都唔多把，相比起啲粗麻布，或者好厚嘅棉布黎講，的確涼又真係舒服又襟著。

唔講唔知，香港特色小食之一嘅布拉腸粉，其中一項精髓就在於塊布，佢所用嘅布料同校服一樣，都係的確涼，因為塊布夠光滑同挺身，米漿無咁容易滲透，可以減低粉皮皺褶，方便整出啲透薄、爽滑嘅腸粉。而且的確涼比棉布更易洗同更易乾，唔會好快污糟同變黃，對於整腸粉嘅師傅嚟講，非常好用。

圖片嚟自網絡。